Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Ҳаётим давомида таскин излаган онларим кўп бўлди. Қуръондан ортиқ таскин берувчини топмадим.
Дардларимни бировга айтиб, юпаниш учун сўзлардан маржонлар тердим, ҳеч бири Аллоҳнинг зикридек юпанч бўлмади.
Йиғлаганда бош қўймоққа жой қидирдим, бирортаси саждадек енгиллик бахш этмади менга.
Муҳтож бўлган чоғларимда бергувчи қўл қидирганларим... Аммо... Аллоҳдан ўзга беминнат неъмат етказувчини топмадим.
Айб қилганимда, хатога йўл қўйганимда, таъна-дашномлар остида қолдим. Тавбамни қабул қилгувчи биргина У бўлди.
Ношукрлик қилганимда кечиргувчи ҳам, шукр қилганимда зиёда қилгувчи ҳам Ўзи бўлди.
Шундай экан, қайтсангиз, Ўзига қайтинг, паноҳ истасангиз, Ўзига юкининг, ризқ изласангиз, Ундан сўранг, хотиржамлик хоҳласангиз, Уни зикр этинг, дардкаш қидирсангиз, Ўзига муножот қилинг.
Барча "калит"лар Ўзида. Қулфлар бирма-бир очилаверади-очилаверади...
Гавҳар Насруллоҳ
